Молитвы к Божией Матери на каждый день седмицы.( преподобного Нила Сороского )
Преподобный Нил Сорский, старец, Нило-Сорской пустыни, в 1870 году отошёл в блаженную вечность, но духовные благоухание святоподвижнической его жизни ещё не испарилось на месте его подвигов. Он и сам оставил по себе собственноручную краткую свою автобиографию, в которой просто и откровенно повествует о достопримечательных событиях своей жизни. О прозорливости и благодатных дарах старца сохранил воспоминания Нило-Сорской пустыни монах Феодор, проходивший там послушание гостинника при жизни старца и видевший нередко замечательные проявления благодатных даров старца в общении с посетителями обители. Старец Божий, при подвигах духовных, отличался и просвещением духовным, был весьма начитан, хорошо владел пером, имел дар учительный, любил составлять молитвословия и песнопения церковные. После него осталось немало поучений, писем, размышлений, молитв и служб. Избранник Божий иеросхимонах Нил родился 22 ноября 1801 года, на праздник Введения во храм Пресвятыя Богородицы, Коея усердный почитатель и служитель был он во всю свою жизнь и Которая осенила его Своим особым благословением.
В Воскресенье
О Всемилостивая Дево Богородице, Мати щедрот и человеколюбия, прелюбезная надеждо и упование мое! О, Мати пресладкаго, превожделеннаго и всяку любы превосходящаго Спасителя Иисуса Христа, человеколюбца и Бога моего. Свете помраченныя души моея! К Тебе аз многогрешный и безнадежный, припадаю,Тебе молюся, Источниче Милосердия, Дево Марие, яже бездну милосердия и пучину щедрот и человеколюбия рождшая; помилуй мя, помилуй мя, вопию ти болезненно, помилуй мя всего уязвленнаго, в лютыя разбойники впадшаго и от одежды, в нюже облече мя Отец, увы мне, обнаженнаго. Тем и лежу наг от всякаго благотворения, возсмердша и согниша раны моя от лица безумия моего. Владычице моя Богородице, молю Тя смиренно, воззри на мя милостивым Твоим оком и не возгнушайся мене всего помраченнаго, всего оскверненнаго, всего в тине сластей и страстей погруженнаго, люте падшаго и возстати не могущаго. Умилосердися убо на мя и даждь ми руку помощи, воздвигни мя из глубины греховны, о Радосте моя! Избави мя от обышедших мя; просвети лице Твое на раба Твоего, спаси погибающаго, очисти оскверненнаго, возстави падшаго люте: можеши бо вся, яко сущи Мати Бога всемогущаго. Излей на мя елей милосердия Твоего, и вино умиления точити ми подаждь: Тебе бо воистину едину надежду стяжах в животе моем; не отрини убо мене к Тебе притекающаго, но виждь скорбь мою, Дево, и души желание, и сие приими и спаси мя, Ходатаице спасения моего. Аминь.
В Понедельник
От скверных уст приими моление, о Нескверная, Чистая и Пречистая Дево Богородице, и не возгнушайся моих словес, о радосте моя, но призри на мя и помилуй, Мати Зиждителя моего. Во время живота моего не остави мене: веси бо, Владычице, яко на Тя всю мою надежду возлагаю, и все упование мое о Тебе есть. Тем и во время смерти моея предстани ми, Помощнице моя, радосте и сладосте моя: не остави мене тогда, надеждо моя, и не посрами мене тогда. Вем бо, вем, Дево, яко многих грехов повинен есмь, окаянный, и трепещу, помышляя час оный; но, Радосте моя, яви ми тогда лице Твое, удиви на мне милость Твою, Ходатаице спасения моего; изми мя, Владычице, от лютости бесовския, и страшнаго и грознаго испытания воздушных духов, и злобы их избави, и всю тогдашнюю скорбь и печаль на радость преложи Твоим присещением. И сподоби безбедно прейти ми начала и власти тьмы, и достигнута покланитися на престоле славы седящему Христу и Богу нашему, со Безначальным Его Отцем и Пресвятым Духом, во веки. Аминь.
Во Вторник
]О, Пресвятая Владычице моя Богородице, Ангелов и Архангелов, Херувимов, Серафимов пречистейшая и всех святых пресвятейшая, Дево Мати Божия! Спаси мя, смиреннаго и грешнаго раба Твоего: Ты бо веси, всемилостивая Госпоже, яко всю мою надежду по Бозе на Тя возлагаю, и несть ми инаго прибежища спасительнаго, токмо Ты, Всеблагая: Ты моя крепость, Владычице, Ты моя и сила, Ты мое радование в скорбех, Ты мое пристанище во искушениях, Ты мое исправление в падениях, Ты и спасение мое всенадежное, о Мати Зиждителя и Господа моего! Помози ми, плавающему в пучине жития сего, люте обуреваемому и бедствующему от потопления греховнаго. Даждь ми руку помощи, Помощнице моя, и избави мя от тимения глубины, да не погрязну в бездне отчаяния: буря бо грехов и страстей возста на мя, и волны беззаконий погружают мя. Но Ты, милосердная Мати, в пристанище безстрастия настави и спаси мя, безнадежных Надеждо и Ходатаице спасения моего. Аминь.
В Среду
Богородице, Ты еси упование мое, Ты ми еси стена и благонадежное пристанище и спасительное прибежище, утомляемому страстей нахождении. Спаси мя от всех враг моих, гонящих душу мою и ловящих ю различными искушении: на пути бо сем, по нему же хожду, многия сети скрыша ми; многия соблазны, многия неудобства, многия, многия прелести, многия немощи, душевныя и телесныя, уловляют мя в падения греховныя. И уже аз, окаянный, впадох в сети вражия, и связан и держим есмь ими: и что сотворю, отчаянный аз, недоумею. Аще бо восхощу покаятися, нечувствием и ожесточением одержим есмь; аще же плакати понуждаюся, не имам сокрушения сердечнаго и слез ни поне единыя капли. Увы окаянства моего! Увы бедности моей! Увы лишения моего! К кому убо прибегну прочее, повинный аз? Токмо к Тебе, благоутробная Мати Господа и Спаса нашего, ненадежных надеждо, стено и покрове к Тебе притекающих! Не отрини убо мене сквернаго: Тебе бо едину в жизни моей стяжах утеху, Дево Марие Богородице, и к Тебе единей во всякой нужде прибегаю со дерзновением: не остави убо мене в жизни сей и во время смерти моея, пристани в помощь, Помощнице моя, да узрят Ти вси врази мои и постыдятся, Тобою побеждении, Владычице, Ходатаице спасения моего. Аминь.
В Четверг
Кто Тебе по достоянию ублажити может, Пресвятая Дево, кии уста воспети способны Твое величие, всяк смысл превосходящее? Вся преславная о Тебе содеянная таинства, Богородице, выше смысла и слова суть; красоте Девства Твоего и пресветлой чистоте Твоей удивишася Херувими и ужасашася Серафимы; чудесе бо Рождества Твоего нетленнаго ни человеческий, ни ангельский язык изрещи может. От Тебе бо безлетный и Единородный Сын Божий, Бог Слово, неизреченно воплощшся, родился и с человеки поживе, и Тя, яко Матерь Свою, зело возвелици, Царицу Тя всея твари показа, нам же известное спасения пристанище. Тем вси под кров Твой притекающий, различными скорбями и болезньми одержимии, приемлют от Тебе богатно утешение и исцеление и Тобою от бед спасаются: Ты бо еси воистину Мати всех скорбящих и обремененных, печальных радость, больных целительница, юным хранительница, старости жезл, праведных похвала, грешных спасения надежда и к покаянию путеводительница: всем бо всегда предстательством Твоим помогаеши и всех заступаеши, Всеблагая, прибегающих к Тебе с верою и любовию. Ты и мне помози, отчаянному, деяний моих ради, Заступнице усердная рода христианскаго; заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота; не остави убо мене и не презри мя, но имиже Сама веси судьбами спаси мя, яко благословенна еси во веки веков. Аминь.
В Пяток
Тебе предаю в защищение живот мой и по Бозе всю надежду спасения моего на Тя возлагаю, Владычице Дево Богородице. Молю Тя, раб Твой, не презри мя многия грехи имущаго, но виждь скорбь мою о сем и недоумение и подаждь ми ослабу и утешение, да не до конца погибну. Простри десницу Твою, Чистая, изми мя от тимения дел моих и постави на чистую пажить заповедей Христа, Царя и Бога моего, да творю я присно, Тобою укрепляем. От грехов моих лютых избави мя, Владычице, и покаяние спасительно мне ниспосли, к Твоему Сыну и Богу Матерним ходатайством Твоим. Свет неизреченныя возсиявшая, просвети мою тьму душевную, от грехов ей прибывшую, Радосте моя, избави мя от обышедших мя невидимых врагов: грехи бо мои мнози и тяжки суть, врази мои люты зело, смерть близь, совесть моя мя обличает, геенна огненная устрашает, червь неусыпаемый, скрежет зубный, тартара тьма кромешняя в трепет мя приводят, ибо ожидают мя прияти, злых дел моих ради. Увы мне! Что сотворю тогда и к кому прибегну, да спасена будет душа моя! К Тебе Единей, сладкая Марие Богородице, услаждающая на Тя уповающим горесть смерти и избавляющая взыскающих к Тебе от лютыя геенны. Ты и мне помози, Всеблагая, не имущему тогда иныя помощи, токмо Тебе, Всепетая. Спаси мя от ужасов смертнаго часа и лютости тогда бесовския, спаси мя от власти духов злобных на мытарствах воздушных по смерти; яви, молюся Ти, яви ми тогда пресветлое лице Твое, Владычице, и не остави мя безпомощнаго. О милосердная Мати! Преклонися на милость ко мне, лишенному милости от дел моих, и умоли, Егоже родила еси плотию, Христа, Спасителя и Бога нашего, нас ради на кресте пречистую Кровь Свою излиявшаго, да и аз причастник буду заслуг Его крестных пред Отцем Его Богом, и их ради получу грехов прощение и вечное спасение, и прославлю неизреченное милосердие Твое, Богородице, и Твое милостивое предстательство в безконечныя веки. Аминь.
В Субботу
Радуйся, Дево Богородице, пристанище и предстательство убогия души моея, надежда сладкая спасения моего! Радуйся, радость от Ангела приемшая в благовещении имеющато воплотитися от Тебе Бога Слова! Радуйся, всех Зиждителя в Твоих ложеснах носившая! Радуйся, Бога плотию рождшая, миру Спасителя! Радуйся, в рождестве девство нетленно сохраншая! Радуйся, от волхвов дары приемшая и поклонение их от Тебе рождшемуся видевшая, и пастырей преславная о Нем словеса слышавшая и в сердце Твоем слагавшая! Радуйся, Отрока Иисуса, Сына Твоего и Бога, во храме, среди законоучителей, обретшая радостно! Радуйся, болезни лютыя в страдании крестном, распятии и смерти Сына Твоего, пресладкаго Иисуса, испытавшая, воскресением же Его тридневным обрадованная светло! Радуйся, вознесение Сына Твоего и Бога со ученики Его во славе небесней видевшая! Радуйся, от Него ниспосланнаго Духа Святаго, в горнице Сионстей в виде огненных языков нисшедшаго, со ученики Господни приемшая! Радуйся, на земле ангельски пожившая! Радуйся, чистотою и святынею вся ангельския чины и всех святых лики превосходящая! Радуйся, возвеличенная славою, пришествием к Тебе Сына Твоего и Бога! Радуйся, Того святым рукам душу Твою радостно предавшая! Радуйся, славно превознесенная Твоим на небеса с телом восшествием! Радуйся, по преставлении Твоем боговидцем апостолом в третий день явившаяся! Радуйся, на небесех от Отца и Сына и Духа Святаго диадемою вечнаго царствия увенчанная! Радуйся, от всех небесных сил приснопеваемая! Радуйся, близ престола Пресвятыя Троицы, на престоле славы возседящая! Радуйся, Бога с человеки примирения виновнице! Радуйся, небесными и земными господствующая Царице! Радуйся, яко ничтоже невозможно есть Твоему ходатайству! Радуйся, яко вси верно к Тебе претекающии спасаются! Радуйся, яко Тобою скорбящии утешение, болящии исцеление, бедствующии благовременную помощь получают! Молю убо Тя, обрадованная Владычице, по-треби и во мне печаль греховную и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но приими милостиво сии гласы радостныя, мною убогим Тебе приносимыя, и предстани ми в помощь во время безпомощия моего, в час страшный оный, егда разлучитися имать душа моя от окаяннаго моего тела; тогда, молю, предстани ми в помощь и избави мя, повиннаго во гресех, наказания за них вечнаго, да не явлюся радование бесов и пища геенне огненней. Ей, Владычице моя, не попусти узрети души моей страшнаго и грознаго прещения и истязания демонскаго, грешником уготованнаго, но предвари и спаси мя, раба Твоего, в час оный ужасный, да славлю Тя во веки, едина надежда моя и Ходатаице спасения моего. Аминь.